Yuusuf Dabageed oo shaaciyey in maalmaha soo socda ciidamo Itoobiyaan ah ay u soo gelbin doonaan B/weyne.

Guddoomiyaha gobolka Hiiraan Yuusuf Axmed Hagar (Dabageed) oo isaga iyo xubno kale oo ka tirsan maamulkiisa ay deegaanka Feerfeer ee ismaamulka Soomaalida Itoobiya marti ugu yihiin ciidamada Itoobiya ayaa sheegay in maalmaha soo socda uu ku soo wajahan yahay, isla markaana dib ugu soo laaban doono magaalada B/weyne ee gobolka Hiiraan.

Dabageed ayaa sheegay iney magaalada B/weyne u soo gelbin doonaan ciidamo Itoobiyaan ah oo ka soo raacay deegaanka Feer feer isaga iyo xubnaha kale ee la socda, isla markaana uu dib u soo ceshan doono awoodii uu ku lahaa gobolkaasi wuxuuna ugu baaqay dadweynaha ku dhaqan magaalada B/weyne ineysan ka barakicin halkaasi, isagoo ugu goodiyey in cidii ka barakacda marka uu halkaasi yimaado loo qaadan doono dembiile.

Yuusuf Dabageed iyo xubno kale oo ka tirsan maamulka gobolka Hiiraan ayaa ka baxsaday magaalada B/weyne, ka dib markii ay babac dhigi waayeen ciidamada maxaakiimta Islaamka ee ka soo horjeeda Dowladda federaalka iyo joogitaanka ciidamada Itoobiya ee dalka Soomaaliya oo sidii daadkii ugu ugu fatahay inta badan deegaanada hoos taga gobolka Hiiraan.