Taliyihii ciidamada Milateriga DF ee gobolka Hiiraan oo xalay kooxo hubeysan ay ku dileen magaalada B/weyne.
Waxaa xalay saqdii dhexe lagu dilay gurigiisa oo ku yaala xaafada Buundo weyn ee magaalada B/weyne gobolka Hiiraan taliyihii ciidanka xoogga dalka Soomaaliyeed ee Dowladda federaalka G/sare C/llaahi Faarax Juuni, iyadoo dilkaasina ay geysteen kooxo hubeysan oo aan la aqoonsan ilaa hadda sida ay ku waramayaan dadka ku dhaqan magaaladaasi.
Dilka taliyaha ayaa ka dambeeyey ka gadaal markii kooxo hubeysan ay bambooyin iyo rasaas ku weerareen gurigiisa, kuwaasoo markii dambe la sheegay iney u suuragashay iney gurigiisa gudaha u galaan, isla markaana la soo baxaan taliyaha oo xiligaasi guriga joogay, iyagoo ka dibna toogtay, waxaana maydkiisa saaka laga helay meel aan sidaa uga sii fogeyn hoygiisa, iyadoo ay ka muuqdeen dhaawacyo rasaaseed oo aad u fara badan.
Dilka taliyaha ayaa ku soo beegmay xili magaalaada B/weyne iyo guud ahaan gobolka Hiiraan uusan jirin wax maamul ah oo ka shaqeynaya ka dib markii tododaadyo ka hor uu halkaasi ka baxay maamulkii DF ay u magacowday gobolka, taasoo ka dambeysay markii ay ciidamada maxaakiinta Islaamka ku sii xoogeysteen gobolkasi, lamana oga illaa hadda sababaha uu taliyuhu u doortay in uu halkaasi sii joogo xili maamulkii iyo ciidamada gobolka ay halkaasi ka maqan yihiin.
