Xildhibaanada Baarlamanka oo lagu amrey iney soo diiwaan geliyaan ilaaladooda iyo hubka ay heystaan
Guddoomiyaha baarlamanka federaalka Soomaaliya Sheekh Aadan Maxamed Nuur (Madoobe) ayaa ku amray xildhibaanada baarlamanka iney si deg deg ah u soo diiwaan geliyaan tirada ilaaladooda gaarka ah ee ay leeyihin iyo hubka ay heystaan.
Sheekh Aadan Madoobe ayaa intaa ku daray in arintan ujeedada laga leeyahay ay tahay sidii loo ogaan lahaa cida ka dambeysa xasilooni darida ka taagan mudooyinkan dambe magaalada Baydhabo, isla markaana wax looga qaban lahaa nabadgelyo xumida magaaladaasi hareysay.
Qaar ka mid ah xildhibaanada baarlamaanka Soomaaliya ayaa lagu soo waramayaa iney soo jeedinta ka timid Sheekh Aadan Madoobe ku tilmaameen mid khalad ah, waxayna xuseen xasilooni darada ka taagan magaalada Baydhabo inay tahay mid salka ku heysa khilaafka siyaasadeed ee ka taagan dalka Soomaaliya ee u dhexeeya ciidamada DF iyo kuwa Itoobiya iyo kooxaha ka soo horjeeda oo haatana aysan jirin wax iyaga dhinacooda farta loogu soo godo.
Magaalada Baydhabo ayaa muddooyinkii ugu dambeeyey waxay wehel u noqotay dilal iyo qaraxyo lala beegsanayo saraakiisha iyo ciidamada Dowladda federaalka iyo kuwa Itoobiya ee jooga magaalada Baydhabo, waxaana dhacdadii ugu dambeysay ay halkaasi ka dhacday maalmo ka hor ka dib markii tacshiirad ay fureen cidamada Itoobiya ay ku dhinteen ku dhowaad 15 ruux, taasoo ka dambeysay qarax loo gaystey oo ay kaga geeriyoodeen labo askari.
