Ciidamo Itoobiyaan ah oo fariisin ka sameystay duleedka magaalada Jowhar ee gobolka Sh/dhexe.
Ciidamo ka tirsan kuwa dowladda Itoobiya oo wata illaa 11 gaari oo u badan kuwa loo yaqaano Uralka ee ciidamada lagu daad gureeyo ayaa gelinkii dambe ee shalay fariisin ku meel gaar ah ka sameystay duleedka magaalada Jowhar ee gobolka Sh/dhexe sida wararka halkaasi naga soo gaaraya ay sheegayaan.
Waxaa la sheegay in ciidamadan oo markii hore ka soo baxay dhinaca magaalada Muqdisho siina maray degmada Balcad ay gaareen magaalada Jowhar gelinki dambe ee shalay halkaasoo ay deegaan ka dhigteen meel 2-km dhinaca woqoqyi kaga beegan magaalada Jowhar, iyadoo dadka ku dhaqan magaalada oo arkayey shalay marki ay magaaladooda dhexmarayeen ay cabsi xooggan ka muujiyeen ciidamada Itoobiya.
Lama oga illaa hadda in ciidamada Itoobiya ay halkaasi sii degenaan doonaan iyo halkaa ay ku sii jeedaan haddiiba ay ka sii dhaqaaqaan, hase ahaate tegitaankooda degmadaasi ayaa ku soo beegmaya xilli aysan wax maamul iyo kala dambeyn ah ka jirin gobolkaasi, ka dib markii mas’uuliyiinta DFKMG ee gobolka ay halkaasi kaga soo carareen markii ay ku sii xoogeysteen kooxaha ka soo hojeeda oo mudooyinkanba dhaqdhaqaaqyo ciidan ka waday qeybo ka mid ah gobolka Sh/dhexe.
