Jowhar oo yeelatay ciidamo madani ah oo ka madax banaan DF iyo dhaqdhaqaaqyada hubeysan ee ka soo horjeeda.
Magaalada Jowhar ee gobolka Sh/dhexe ayaa lagu soo waramaya in loo sameeyey ciidamo ku lebisan dareys gaar ah oo ka madax banaan dowladda federaalka Soomaaliya iyo dagaalyahanada ka soo horjeeda, kuwaasoo sugaya amniga gudaha iyo hareeraha magaaladaasi.
Sameynta ciidamadan ayaa ka dambeysay ka dib kulan ay magaaladaasi ku yeesheen waxgaradka ganacsatada iyo saraakiisha ciidamada maxaakiimta Islaamka ee ku sugan gobolka Sh/dhexe kaasoo looga hadlayey sidii loo adkeyn lahaa amaan xumida ka jirta magaalada Jowhar, kaasoo ugu dambeyntii la iskula gartay in la abuuro ciidankan oo saaka markii ugu horeysay ka howlgaly magaalada Jowhar isla markaana fariisin ka dhigtay saldhiga booliska magaaladaasi.
Abuurida ciidamadan madaniga ah ee loo sameeyey magaalada Jowhar ayaa ka dambeysay ka gadaal markii magaaladaasi iyo hareeraheeda iyo weliba deegaano kale oo ka tirsan gobolka Sh/dhexe ay ka dilaaceen kooxo burcad oo dhac xooggan u geystay dadka safarka iyo kuwa kale ee ku dhaqan gobolkaasi, kuwaasoo ka faa’iideysanaya maamulka la’aanta ka jirta ka dib markii ciidamada DF iyo maamulka gobolka ay halkaasi ka soo baxeen.
