Waxaa maalintii saddexaad halkiisii ka sii socda dedaalkii uu waday ergayga gaarka ah ee Qaramada midoobay u qaabilsan arimaha Soomaaliya iyo beesha caalamka ay ku doonayeen iney isku soo hor fariisiyaan wufuuda ka kala socota dowladda federaalka Soomaaliya iyo isbaheysiga ka horjeeda ee dib u xoreynta Soomaaliya oo haatan ku wada sugan magaalada Jabuuti, iyadoo dedaaladaasina ay u muuqdaan kuwo aaney ka soo bixin wax natiijo ah oo la taaban karo.
Wafuuda labada dhinac ayaa lagu soo waramaya in xitaa hal hotel la iskugu keeni waayey ka dib markii dhinaca isbaheysiga dib u xoreynta ay diideen wax wadahadal ah in ay la furaan dhinaca dowladda federaalka Soomaaliya, waxayna ku adkeysanayaan go’aankoodii ahaa in aysan wax wadahadal ah la galeynin inta askari Itoobiyaan ah uu ku sugan yahay ciida Soomaaliya, iyagoo ku eedeeyey in ciidamadaaasi ay xasuuq aan kala sooc laheyn u geysteen shacabka Soomaaliyeed.
Wafuuda beesha caalamka ayaa dedaal aan kal go’laheyn wada kaasoo ay ku doonayaan iney labada dhinac iskugu keenaan miiska wadahadalka kaasoo hase ahatee dad badan ay isweydinayaan sida uu suura galka ku noqon karo, waxaana wafuuda beesha caalamka iyo kuwa Q/midoobay ee jooga magaalada Jabuuti ay raadinayaan jawi abuuri kara in ciidamada dalka laga saaro isla markaana lagu soo bedelo ciidamo kale oo ka socda qaramada midoobay si ay ula wareegaan howsha nabad ilaalinta ee Soomaaliya una buuxiyaan kaalintii ciidamada Itoobiya si ay u sii jirto dowladda Soomaaliya oo laga cabsi qabo haddii ciidamada Itoobiya meesha laga saaro iney burburto.
